pm
احبائي ربما يختلف معي البعض ولكن هذا ما اكتشفتة مؤخرا؟
انا اسف اني كنت حمار؟
لاني صدقتك يوم قلت
هجيب منين؟
وسبتني بجد احتار
غمضت عيني وشيلت علي ظهري
كتير كتير اسفار
ومشيت وقلت مش هسأل
ما انت عارف حتي اللي
جوايا من افكار؟
بأيدك طريقي كان مرسوم
وهو دة خط السير
وخطوتي كانت محسوبة
لا يمين ولا يسار
وصعب احلم
وصعب افكر
بس اللي كان مسموح
اني ممكن في يوم انهار
انا اسف اني كنت حمار
وفي يوم قلت اتمرد
وارفص اي قرار
واعيش واستقر
ويبقي عندي زريبة ودار
وبعدت بعيد عن الانظار
لكن هتروح فين ياحمار؟
هو انت حر؟
ولا بتستخبة حواليك اسرار؟
قالولي عيش انت فعلا حر
بس ياريت لما تخلف
ما تجبيش اكتر من حمار
واهو انت اللي في ايدك الاختيار
وعشان نساعد
وماتقولش علينا اشرار
انت عليك الغدا والعشا
واحنا علينا الفطار؟
انا اسف اني كنت حمار
وفضلت انهق قصدي اصرخ
وقلت لازم اشوف الكبير
لازم يعرف اني مجبور
واني مش لاقي حتي الشعير
مش هو ولي الامر
وهو كبير الحمير؟
وخرجت اجري واجري
وبما اني حمار بس بفك الخط
وافهم شوية في التعبير
شفت لوحة مكتوب عليها
ميدان التحرير
وناس كتير ماشية
وسألت نفسي؟
هما دول بشر
ولا انا قليل النظر
لاء بشر والله بشر
والغريبة اني شكلهم
وبتكلم كمان زيهم
معقول كنت عايش سنين اسير؟
انا اسف اني كنت حمار
وسمعتهم بيطالبوا بالتغير
عايزين واحد منهم
بس يكون عنده ضمير؟
وشفتهم صغير وكبير
وفيهم الغني والفقير
ومن حموريتي؟
قعدت اصرخ واقول
حرام عليكم لية مش عاجبكم الكبير؟
وجاني واحد باين علية الوقار
وقالي انت يا بني ادم
انت اية مش عايش
انت اية مش فاهم
في ناس عايشة تحت خط الفقر
وناس غموسها بطعم القهر
وناس ميتة وهي عايشة
ولو جابولها الف عمر
وبعد دة كله لسه مش فاهم
انت اية حمار؟
قلت اكيد يعرفني
ما انا اصلي كنت حمار؟
انا اسف اني كنت حمار
وفي لحظة حلمت
وانا واقف مكاني
وشفت شريط حياتي
وكأن العمر رجع تاني
ولقيتني كنت عايش غريب
بدور في ساقية ليل ونهار
كنا عبيد واحنا احرار
وسجن كبير مفتوح
بدون اسوار؟
وكان شرط الافراج؟
انك تخرج تبيع وطنك واسمك
وتهد من قبلهم كل حيطان الدار
ولاول مرة احس اني صاحب قرار
ولاول مرة ارفض الاحتكار
ارفض الانكسار
وقلت قبل ما ادخل الميدان
واكون واحد من الثوار
لازم اعتذر
وبكل فخر قدمت
اعتذاري للحمار؟
_________________________________________________________________ بقلمي
محمد عبده
5/ 2 / 2012[/[/color]b]
الأحد فبراير 05, 2012 1:15 pm