اية يامصر؟
لحد امتي هتبات
علي خدي دمعتي
ولية ادور في صناديق الزبالة
علي لقمتي
ولية ناس بعينها
يشتروكي ويبعوكي
وانا الضحية وبعيني
بشوف موتي ودفنتي
انا قلت اضحي
وفداكي عيالي وهدمتي
واشوفك يامصر في الارض
من تاني جنتي
اصرخ في ارضك
وانادي فين تاريخك
فين نيلك فين حنيتك
لية اعيش غريب جواكي
وانتي امي
ولو عروكي استرك
في التاريخ درسونا
ازاي نحافظ علي عزتك
واتولدنا نعرف
انك ام الحضارة
ولا حد ابدا يهزمك
لسة الايادي
بتخرب وبتفرق
وكل يوم الف شهيد
لسة دم ولادك
بيروي ارضك
والقاتل مغرور وعنيد
هو احتلال ولا انقلاب
ولا خلاص رجعنا
لزمن العبيد
مش هسلم ومش
هرمي الرايا من ايدية
مش هنام ولو تسهر
العمر كلة عنية
لازم اخد بالثار
يا ام الولد والصبية
ولابد في يوم افرح
وادعي كل الدنيا
وبنفسي ازفك وبدمي
تكوني متحنية
اوعدك يامصر هتعودي
وليكي روحي هدية
ياصاحبة الهرم والتاريخ
الفرعوني الجميل
يا ام نجيب وعرابي وجمال
وسيد درويش و زويل
يا ارض العراقة
يا ارض الصداقة
والكل في رقبتة
ليكي جميل
والله لو فيكي كل الهموم
لا اشيلك علي ظهري شيل
والف العالم واقول انا مصري
وادعيلك في النهار واليل
يارب ياللي ذكرتها
في كتابك العزيز
احفظها من كل شر
جيل من بعد جيل
______بقلمي
محمد عبده__________________________
الأربعاء يوليو 04, 2012 11:36 am