بسم الله الرحمن الرحيم
السلام عليكم ورحمة الله وبركاتة
ولدي الغالي / عبد الستار
كيفك ياولدي وكيف احوالك كلتنا مشتاقين ليك ابوك واختك واللي
بالي بالك بتسلم عليك.. سمعت انك بعافية شوية والنبي ياولدي تطمني
عليك ويارب تكون الحوالة وصلتك اللي بعتهالك ابوك .. هما صحيح عشرين
جنية بس ياولدي دول اللي اتفضلوا من معاش ابوك .. حاول ياولدي تاكل
مليح وياريت ياولدي تبطل الدخان عشان صحتك واهو برضوا يتفضل معاك
قرشين .
طمني ياولدي عن احوالك بتنام كويس بتتغطي كويس وكيف اللي
بيحصل حداكم بنشوف في التلفزيون اللي عند عمك محروس البقال ان في
مشاكل في مصر وناس كتير بيقولة مش عايزين الريس والنبي ياولدي دة
الريس طيب وغلبان اوعي ياولدي تكون معاهم مش انت قولت قبل سابق انك
هناك بتحفظ الامن .. اوعي ياولدي وحياة ابوك لا تضر حد ولا حد يضرك
قولي ياولدي هو صحيح في ناس بتنضرب وناس بتموت لية ياولدي كل المشاكل
دي هو يعني كان الريس اللي بيرفع الاسعار ولا هو اللي قال للشباب دول
ماتشتغالوش والنبي ياولدي هو هيعمل اية ولا اية .
عشان خاطري ياولدي وخاطر ابوك اوعي ياولدي تعمل حاجة عفشة وتكون
بتضرب اخواتك زي ما بيقول عمك محروس .. انا عيزاك ترجع وانشالله تشتغل
حدانا ولا تزرع قراط الارض اللي مأجرة ابوك واهو ياولدي مدارينا
والحمدلله .. والنبي ياولدي انا كل يوم بدور عليك لما عمك محروس قالي
يمكن اشوفك في التلفزيون ومن وقتها وانا كل يوم بدور عليك بس ياولدي
اللي بشوفة واعر اوي هي مصر كبيرة اوي كدة وكل الناس دي كيف عايشين
في الدوار دة والنبي دة حتي دوار العمدة الكبير مايساعيش اهل القرية
ولا حتي نصهم ..
اخويا الحبيب
عبد الستار
انا اختك هنية اللي بكتبلك الجواب دة والنبي شوف كدة مش بقي خطي
حلو طيب وحياة النبي ولا غلطة وكتبتة من مرة واحدة وعلي طول من حنك
امك علي الورقة علي طول.. والنبي ياخويا اوعي تروح ميدان التحرير
ولو روحت والنبي تخليك في حالك وتطمني عليك ولا تخلي سي احمد يكتبلك
جواب عشان امك تطمن عليك .
والسلام ختام وليس بيننا ختام
اختك / هنية
******************
بقلمي
محمد غبده
17 / 3 / 2011
_________________
الجمعة يونيو 17, 2011 3:25 pm