ترتيب الأسئله كما ورد ذكرها بالمنهج الالكترونى المقرر للاناث الجالسات على النت:
1- اسمك ايه؟
2- دا اسمك المستعار ولا الحقيقى؟
3- كام سنه؟
4- متجوزه؟ أو حتى مخطوبه؟
5- حبيتى قبل كده؟ ياريت تحكيلى ............
6- دراستك؟
7- بتشتغلى؟ لو الاجابه نعم هيسكت ,أما لو لا : زى الفل طبعا لانك كده تبقى فاضيه وهتقعدى تسليه
دى معظم الاسئله المتعارف عليها وان شاء الله نص الامتحان ميخرجش عنها .
والله بقى يا أما انه يتخنق منك ويذهب بلا عوده ,أو أنه يستحلى الكلام ويكمل وده غالبا اللى بيحصل بس عشان بالبلدى كده يجيب اخرك مش اكتر
8- ممكن طلب؟
اتفضل
ممكن الاميل أصل النت هنا بطىء قوى.
9- ممكن تليفونك؟
مش عايزالرقم عشان حاجه والله بس عشان لما أبقى موجود أرنلك تفتحى وأوعدك بجد انى مش هرن عليكى خالص أو اضايقك الا اذا انتى طلبتى . ولو مش عايزه اوك بلاش.
صدقونى يا جماعه الاسئله دى بالنص من امتحان السنين اللى فات ومستحيل يخرج عنها الامتحان.
بنوتاتى الحلوات(حقيقه هامه ونظريه ثابته هتحتاجى لها فى الامتحان قوى) : مفيش ولد بيحترم (او بمعنى ادق بتكون موضع احترام بالنسبه له) بنت كلمها على النت الا واحد فى المليار دا أذا فعلا تعارفهم بدأمن النت الا فى حالات شاذه وقليله جدا ,اذا مثلا اختلف سبب ومكان التعارف عن الاسباب المعتاده وبالفعل فى ناس محترمه جدا بس بكرر تانى واحد فى المليار.
99و99 من الشباب اللى على النت بينظروا للبنت نظره من تحت قوى ؛ هم شايفينها: بنت , سايبه, منحله, فاضيه, قاعده على النت,لا وراها شغله ولا مشغله, ناس تانيه شايفين قعادها على النت راجع لظاهره العنوسه وربما يكون سبب, ناس تالته شايفينها ( حاجات محبش اخوض فى ذكرها بس هى نهايه لاى علاقه بين شاب وفتاه) ومع انها مستوى عالى ومتقدم قوى ,بس بعرفك يا حبيبه قلبى أن ده الغرض الاساسى لاى ولد بيكلمك على الشات مهما طالت المده لانتظاره ومهما صبر عليكى.
واذا كملتى معاه صدقينى هتوصلى هتوصلى مهما قاومتى , يمكن فى ناس قبلك كانت قويه وقاومت وجايز انتى تضعفى احنا بشر ومن صفاتنا الخطأ .
هو شايفك واحده سهله ومتاحه له ومفيش حواجز تمنعه من الوصول ليك او انه ينال غرضه.
دا واحد تناسى وجود ربنا, فقد اخلاقه, نيم ضميره, ماتت مشاعره, مات احساسه بخوفه على امه او اخته او زوجته او بنته ,أطلق العنان لغرائزه ولم يوقظ فقط سوى شهواته.
عشان كده بنصحك بجد لو لسه جديده هنا,بلاها خالص الامتحان ده مش محتاجينه مش هيضيفلك حاجه ,جايز تكتسبى خبره بس صدقينى هتدفعى التمن مقدم وهيكون غالى قوى . وفرى على نفسك سنتين من عمرك تقضيهم فى بير من الكدب والخداع وتزييف المشاعر والاهم هتكونى بتهينى نفسك.
وبما أن الزمن بيتطور فالولد مبقاش عنده وقت عشان ياخد الايميل ويتكلم بقى ويضيع يا عينى كام يوم معاكى . لا خلاص الجيل ده انتهى دا جيلنا جيل العواجيز من سنتين فاتوا ,انا غبت عن النت حوالى 6 شهور رجعت لقيت الحال اتغير ,الموضه دلوقتى أنه يطلب التليفون على طول (أيوه الراجل معندوش وقت) وان رفضتى يقلبك ويشوف غيرك , مش فارقه معاه البنات بالالاف. الحاجات دى انا اتفاجئت بيها قريب لما جانى دعوه اشتراك لموقع تعارف زى الفيس بوك كده واسمه نت لوج بصراحه الناس هناك عمليه جد ومعندهاش وقت فانا تقريبا مضفتش اى حد هناك لان كلهم عايزين الايميل والتليفون!!!.
بكرر كلامى مش كل الناس كده , بالعكس فى ناس محترمه جدا جدا جدا ومشاعرهم ارق من النسيم ,ناس فعلا لم أتوقع وجودهم فى هذا العالم الدنىء.
وان شاء الله فى حلقاتى القادمه هنرجع مع بعض بالعمر سنتين لورا ,هتقابلوا معاى ناس كتير, هعرفكوا عليهم , نماذج مختلفه : ناس هتكرهوهم بدون ما تقابلوهم , وناس هتحبوهم جدا وهتتمنوا أعرفكوا بيهم ,هتقابلوا:
جبل سوهاج
, صالح(ياترى هو اسم ولا لقب ولا اسم على مسمى)
, زينب
, قاتل اخوته
, فرعون الاقصر( فى لسه فراعنه عايشين ههههه)
,هتقابلوا كمان ( حد مش لاقيه وصف ليه لان مقدرش اعبر عنه بكلام البشر هو أرق حد فعلا كان موجود على النت ويمكن فى الدنيا)
, هتقابلوا كمان عمر ( محترف تزييف وكدب وخداع)
,هتقابلوا كمان أدهم الشرقاوى (وده لقب مش اسم , وانا سميته كده لان مش بس نفس البلد لا دا كمان بيحمل نفس الصفات وبعد ما عرفته مش محتاجه اسمع مسلسل أدهم الشرقاوى .
هتقابلوا كمان عبود ( وده بقى سى السيد 2010) ,
وغيرهم كتير وكتير . انتظرونى فى الحلقه القادمه ,واستعدوا عشان نرجع باله الزمن سنتين هتعيشوا فيهم معاى بجد وهتحسوا باللى حسيته وهسيب ليكوا الحكم على كل واحد فيهم
الأحد مارس 27, 2011 3:04 pm